Öтнас и колис Ыджыд война тöдлысьыс

Афанасий Георгиевич Шаховкöд адззысим керка дорас. Буретш вöлi петöмаöсь гöтырыскöд картупель керны. Чуймöдiс: локтан вося январын 90 арöс нин тыртö, Ыджыд война пыр мунiс, а пыр на зiльö мыйкö вöчны. Гашкö, ciдзи и колö да, кымын пессян — дзоньвидзаджык лоан.

Чолöмасим, висьтасим. Миян вылö недыр видзöдöм бöрын нуöдiс керкаас.

А веськыда кö шуны, Ыджыд война вылö ветлысьыс миян районын лыда морт колис. Тимшерын тай Афанасий Георгиевич öтнасöн нин кольöма ловъяöн. Эз ков сылы ёна ошйысьны. Ёна корöмöн пасьталiс жö медальяса да орденъяса пиджаксö. Видзöда, кык медаль «За отвагу» (медся донаыс салдатлы), «За боевые заслуги», Карельскöй фронт вылын воюйтöмысь медаль да Отечественнöй войналӧн I степеня орден. Мый синъяс улö усис: медальяслöн лента бонзьыштöма нин. Мирнöй кадад, дерт, кöнкö, эз кыскась медаля морöсöн. Война кадас на медальясыс зёльöдчöмаöсь морöсас.

— Помнитанныд жö öд, кöнкö, мыйысь «За отвагутö» сетiсны, салдатлы пö тай медся дона сiйö? — юалам Афанасий Георгиевичлысь.

— Веськыда кö шуны, ог и тöд, мыйысь медальсö сеталiсны, — вочавидзö А. Шахов. — Ми öд сэки эг наградаяс йылысь мöвпалöй. Окота вöлi сöмын ловйöн кольны да кортöм «гöсьтъясöс» йöткыштны чужан му вылысь.

Сiдзсö, комиöн кö, Опоньлы армияö колiс мунны 1936-öд воын нин, нö öткымын документъяс тырмытöм вöсна кольöдлöмаöсь на.

1940-öд воöдз удитöма нин гöтрасьны. Ачыс Кекурын чужлöма, а гöтырсö Вапöлкаысь аддзöма. Сэтчö тесьт дорас и овмöдчылöмаöсь.

— 1940-öд вося июньын Галя гöтыркöд буретш пур кылöдiм Сыктывкарöдз, — казьтылö Афанасий Георгиевич. — Сэсся бöрсö кайигöн Кулöмдiнын тöдсаяс висьталiсны: тэнö пö военкоматсянь юасисны. Me и пыри сэтчö, йöйыд. Шырисны да — армияö. Дерт, сэки думыштлыны эг кужöй, мый татшöм ыджыд война пансяс.

Архангельск обласьтса Исогорка сиктсянь неылын, военнöй велöдчан шöринын, Опоньлöн черöн уджалан киподтуй дорö содтiсны снайперскöй винтовкаысь лыйсян сямлун. Велöдчан шöринсянь вуджöдiсны Карелияö, 88-öд стрелкöвöй полкö. Сэкся кадö фашистскöй Германиялöн зыртчöмыс кылiс нин, а во джын мысти и Ыджыд война пансис.

— Дерт, думыштлыны эг кужлöй, мый та кузя да татшöм сьöкыд война лоö, — ышловзис Афанасий Георгиевич. — Мыйтакö тай грекö вöйтчылiм матькöмнад да Енлысь прöща корлiм, кöть эськö сьöлöмсянь Енмыслы эскöмыс эз вöв.

Менам гижан геройлы тöдвылас воис и сiйö, мый армияас мунiгöн чунь йывсьыс вир босьтiгöн садьсö воштылöма. А война пансигöн мöвпыштöма: мый нö пö лоö, ранитча кö? Терпитöма тай, Карельскöй фронт вывсянь Берлинöдз мунтöдз. Кымын медаль да орден, сы мында жö вылас и ранаыс.

— Öтчыд Карельскöй фронт вылын на наступайтiгöн босьтiм неыджыд сикт, — казьтылö Афанасий Георгиевич. — Сэнi öд эз сöмын финнъяс вöвны, немечьяслöн на полкъяс сулалiсны. Сикт бокас воöм бöрын казялi окоп бокысь кольöм ручнöй пулемёт да лентаас 150 гöгöр патрон. Ставсö пышйысь фашистъяс бöрся лэдзи. Скöрман öд, быд лун ёртъясöс виöны да. Сэсся сэки жö миян 2 батальон мунiс водзö, а бöрсö некод эз лок. Миян торъя батальон кытшö жö веськалiс да, лыда морт ловйöн петiм. Уна национальностя йöз вöлiм, но мортöс морт туйö пуктiм. Минаясöн вольсалöм нюр шöрö веськалiм. Лыйлöны бöрсянь. Кыкöс ранитiс мышсяньыс морöсöдзыс, но миян отсöгöн петiсны тылöдз.

Вöлöма на и медся сьöкыд здук. Эстонияын нин ыджыд пушкалöн снаряд улö веськалöма отделениеыс. Кызвыныс пöгибнитöмаöсь, а Опонь удитöма мыш вылас шыбитчыны да, и со на сюрöма: осколокъясöн воштöма син пöвсö, жугöдöма тшöтш и кыкнан кисьыс лыяссö.

— А öтчыд сёян вöлi нуа асланым отделениеö да чугуннöй мина вылö веськалi, став шинель пöлаöс чишкалiс, а ачымöс ранитчöмöн эг и кыв. Бöрыннас нин казялi, мый кирзöвöй сапöг пыдöсöс осколок косялöма, ранитöма и кокöс. Перйисны жö тай. Ыджыд аттьö колö шуны миян врачьяслы да медсестраяслы. Мыйтакö олöм дорйисны, ки да кок колисны ми-воклы.

— А дзик повтöмöн, кöнкö, энö жö вöвлöй, — водзö нуöдам сёрни. — Сiдз нин ловъя ловсö вöчöма, мый весиг няйт чут кодь геб, да овны кöсйö…

— Дзик повтöмыс, дерт, некод абу. Выль локтысьяс, весиг офицеръяс, первойысь веськаласны бомбитöм либö артиллерияöн лыйлöм улö да повзьöмысла весиг гачьяснысö дукöсьтлöны.

Быд лун виччысим сьöлöмö пуля веськалан дой да, Енмыс тай видзис. Ылöсас шулi аслым, мися, тайö пöcь туйыд 3 во шогрöдлас. Да сiдзи öд и лои: 3 восö садьма вöлi да, пöсь визувтö юрсянь кок улöдз.

А мыйла нö ме босьтчи гижны картупель керöмсянь? Сiдз нин тай Енмыс шуöма. Афанасий Георгиевичлöн первой гöтырсяньыс челядьыс абу и вöлöма. А 16 во сайын пöлыс и ачыс эновтöма вöльнöй светсö. Сэсся выльысь гöтрасьöма, Варламовкаысь Тимшерö жö овны вуджысь дöва Галина Гавриловна вылö. А тайöс пасйыны, кöть öтарсянь, кöть мöдарсянь — быть. Кöть абу аслас, мöд гöтырыслöн нин пиыс, Миша, Афганскöй война пыр жö мунöма, тöдö жö пуляыдлысь кöрсö. Сöмын талун оз вермы отсасьны мамыслы да дядьыслы. Аслыс керка кыпöдны босьтчöма.

И. Тарабукин.

 Тарабукин, И. Öтнас и колис Ыджыд война тöдлысьыс / И. Тарабукин // Парма гор. – 2003. – Кöч 9 лун [9 сент.] (108-öд №). – 1-2 лист бокъяс.

Об участнике Великой Отечественной войны, уроженце деревни Кекур Афанасии Георгиевиче Шахове, ныне жителе посёлка Тимшер Усть-Куломского района.